今晚歐聯分組賽重燃戰火，重頭戲係E組衞冕嘅巴塞隆拿主場迎戰利華古遜。「地上最強」近期認真多災多難，日前連球王美斯都重創要抖7至8周，「光頭仔」尼馬又唔弗，「MSN」鋒線剩番蘇亞雷斯撐住，火力大減，面對決心死守嘅利華古遜唔慌多波入，斯維寧捧入球細。

（有線64及203台周三凌晨2時45分直播）

尼馬唔弗難擔大旗
成日都講歐聯衞冕魔咒，自改制後從未有球隊能蟬聯冠軍，不過上屆盟主巴塞嘅衰運嚟得更早，先喺季前不敵畢爾包失落西超盃，由達史特根代替受傷嘅哥迪奧巴禾把守大門堅唔穩陣，成日畀人笠死。最弊係打遍天下無敵手嘅「MSN」鋒線都出事，球王美斯於日前聯賽對拉斯彭馬斯，開波冇耐就傷出，賽後證實佢右膝韌帶受傷要抖7至8個星期，斯維大膽講句，一支美斯缺陣嘅巴塞，起碼冇咗5成「攻」力，而剪咗個光頭look嘅尼馬，對拉斯彭馬斯場波射失12碼，明顯唔弗，靠佢擔大旗唔多掂檔。

「MSN」得番蘇亞雷斯靠得住，但佢勢必畀對手嘜死喇，由於巴塞今夏放走柏度洛迪古斯，而轉型打前鋒表現唔錯嘅拉芬拿艾簡達拿，上輪作客羅馬受傷更提早收咧添，後備席剩番小將蒙尼亞艾哈達迪同辛度拉美利斯可用，佢哋邊夠班頂美斯個位呀？

利華作客決心死守
雖然巴塞黑過墨斗，但預計利華古遜亦唔敢輕舉妄動，畢竟「地上最強」連西超盃同聯賽在內，今季主場錄得3勝1和，不過值得一提係，當中只有1場開出大盤（贏拉斯彭馬斯2比1之役嘅中位數係3.5球），今仗冇埋美斯更火力大減。而且利華日前聯賽大炒不來梅3粒之役，冇讓查漢奴古、奇雲甘保爾、雲達爾拿斯文圖等主力打正選，擺明留力喇，相信作客會決心死守頂住「地上最強」，今仗唔慌多士哥，入球細有成2.2倍相當吸引。