海德堡聯增兵一味夠噱
澳洲足總盃8強大戰今日繼續上演，海德堡聯會喺主場越級挑戰墨爾本城，賽前佢哋更有驚人「增兵」，前希臘國腳加素蘭尼斯答應今場為主隊助拳出擊，的確係好夠噱頭！不過墨爾本城係上季澳職第5名球隊，今季更大換血簽入包括丹麥門將蘇連遜在內嘅10名新球員，目標直指冠軍，海德堡聯好難做攔路虎，「-2」照捧1.94倍「讓球客勝」！

36歲加素蘭尼斯 上周四先抵埗
海德堡聯打入澳總8強後，隨即宣布加素蘭尼斯答應加盟踢呢場大戰，不過佢已經36歲，呢位「貴賓」中場上星期四先至飛嚟澳洲同隊友見面，成隊心態似係踢表演賽多過爭入4強，加素蘭尼斯可以為球隊注入幾多實際戰鬥力好成疑問。

墨爾本城上季有韋拿、林柏特同杜夫等名將，但表現都唔係咁好，今季佢哋大換血狂簽10人，包括經驗豐富嘅丹麥門神蘇連遜同愛爾蘭國腳後衞艾朗曉士，最重要係核心人物阿倫穆爾繼續留隊，佢哋為備戰呢場8強大戰，日前仲約阿德萊德聯閉門拍跳，態度相當認真，話晒係曼城重金投資嘅衞星球會，墨爾本城點都要爭番隻盃交代一下，今場憑質素加決心信墨城有力大勝。