拜仁高班又有態
拜仁慕尼黑射手羅拔利雲度夫斯基呢期着晒火，之前對禾夫斯堡上演完「9分鐘5士哥」神迹之後，上輪德甲對緬恩斯再整兩粒，腳風真係順到不得了。今場拜仁喺歐聯F組主場對薩格勒布戴拿模，對手好難頂得住呢位波蘭射手。拜仁讓2球，都要玩1.65倍「讓球主勝」！

羅拔利雲度夫斯基對「狼堡」後備上陣，9分鐘就入咗5球，連教練哥迪奧拿都睇到「O晒嘴」！呢位波蘭射手喺啱啱嗰輪德甲對緬恩斯，復任正選亦冇放軟手腳，再省兩粒幫球隊以3:0大勝對手，成為德甲史上最快入100球嘅外援。

9連勝順到不得了
「羅拔仔」2場入7球，腳風咁順，薩格勒布戴拿模對住佢，除咗求神拜佛佢自己射唔入之外，都好難阻到佢入波。雖然拜仁有兩大主力列貝利同洛賓長抖，但係球隊冇佢兩個都踢得咁順，今場喺主場作戰，要將今季正式比賽連勝紀錄，改寫到10場完全冇問題，

薩格勒布戴拿模喺F組首輪以2:1擊敗英超勁旅阿仙奴，真係好叻仔。不過，呢支克羅地亞球隊可以爆冷，都係多得「兵工廠」唔爭氣，唔代表佢哋真係「巨人殺手」。而且今場對手拜仁實力高阿仙奴一班，薩格勒布戴拿模想偷雞，真係諗多咗囉！