今晚歐聯大戰戲碼，由巴塞隆拿喺魯營球場恭候E組對手利華古遜。呢支衞冕冠軍今季開局無復上季勇態，無論攻守都跌晒watt，家陣佢哋莫講話想大數對手，就連保住清白身亦未必做得到，加上王牌美斯養傷，咁嘅情況巴塞仲要讓到一球、球半，堅難捧得落手囉！相反撐利華就算佢哋輸一粒都有錢收，咁筍梗係轉捧1.93倍下盤好過。

（有線64及203、中央5台周三凌晨2:45直播）

巴塞今季堅黑仔，早前先宣布中場拉芬拿艾簡達拿長抖半年，轉個頭又到美斯因為左膝韌帶受傷休息2個月，班擁躉唔驚就假。雖然唔少傳媒認為尼馬可以擔大旗，之但係呢位巴西前鋒今季入得3粒狀態麻麻，想取代美斯成為首席士哥拿唔易喎。

巴塞死火得1場贏多過1粒
連埋歐超盃、西超盃在內，巴塞今季一共踢咗10場比賽，結果只係得1場可以贏到對手至少2球，計落得嗰1成贏盤率，點撐先？況且巴塞防線今季勁多漏洞，至今得嗰2場波可以零封對手，門將哥迪奧巴禾復操冇耐，未知能否趕及上陣。須知道另一門將達史特根今季表現極度「搶鏡」，開季唔夠2個月已經2次被對手笠入收死，繼續搵佢把關怕且巴塞連續6場失守都似。

何況利華古遜未有輕敵，賽前中場基拉馬強調巴塞唔係得美斯1個球星：「冇咗美斯係有着數，不過巴塞仍然有班超級球星喺度，想攞到分數絕對唔可以大意。」事實上，呢班波喺11/12年球季歐聯16強賽事，兩回合計輸2:10畀巴塞踢出局，其中作客嗰場衰到以1:7慘敗收場。正所謂見過鬼都怕黑，今場佢哋落力防守費事衰多鑊，巴塞想贏唔係咁易囉！