「寸王」造訪舊主冇料到
歐聯今晚戰火重燃，焦點肯定係波圖鬥車路士嘅G組大戰。將會成為歐聯史上「出場王」嘅卡斯拿斯不嬲唔妥莫連奴，破紀錄之夜梗要保住大門，順便報埋之前喺皇馬被投閒置散嘅仇恨。況且「藍戰士」今季走晒樣，就算有迪亞高哥斯達復出都唔睇好，平手盤捧波圖最明智。

（有線61及201周三凌晨2:45直播）

第152次歐聯披甲 超越沙維成出場王
卡斯拿斯喺皇家馬德里畀莫連奴害到雞毛鴨血，家陣轉投波圖重過新生，今晚將會第152次喺歐聯舞台出戰嘅佢，會超越西班牙同胞沙維成為呢項賽事嘅上陣次數最多球員，喺呢個咁值得紀念嘅日子對住仇家，「聖卡斯」老虎蟹都打醒十二分精神。雖然陣中翼鋒巴謙美右膝受傷未必落場，不過捷西斯哥朗拿同阿布巴卡等攻擊好手一樣極具威脅，唔使戥波圖鋒力擔心喎！

莫帥兩訪波圖不勝 4件後衞冇個似樣
車路士領隊莫連奴昔日教波圖打響名堂，2004年仲帶領呢班波勇奪歐聯，但呢度再唔係「寸王」嘅福地，莫帥離隊之後曾兩度喺歐聯戰場帶隊造訪波圖，但只係錄1和1負戰績。喺英超坐波監嘅迪亞高哥斯達今仗可以擔正，但「迪哥」新季只係入過1球咁大把，今鋪係咪會幫到手好難講。

「藍戰士」啱啱喺聯賽失分，對住隊仲未開齋嘅紐卡素都幾乎輸波，球隊狀態有幾曳大家有眼睇，鐵閘伊雲洛域跌晒Watt，葛特蘇馬、泰利、加利卡希爾3個中堅冇個穩陣，造訪跨季連續12場正式賽事未輸過嘅波圖，莫連奴好大機會再次出醜。