基奧特停賽 變陣砌奧林比
歐聯F組賽事阿仙奴主場對奧林比亞高斯，「兵工廠」分組賽首戰落筆打三更，意外輸畀薩格勒布戴拿模，射手基奧特領紅成罪人，今次呢位中鋒停賽反而係好事，因為以禾確特同阿歷斯山齊士（A山）擔正攻堅，效果一定更好。希臘奧林比亞高斯上屆分組賽客戰3仗全敗，證明作客唔識踢，阿仙奴讓球主勝夠穩！

（有線62及202台周三凌晨2時45分直播）

阿仙奴分組賽首戰作客薩格勒布戴拿模，諗住實食冇黐牙，點知早喺24分鐘就失守，「銀河唯一」基奧特更喺40分鐘2黃1紅被逐，搞到球隊打少個下最終輸1比2。今仗基奧特停賽，加上韋碧克養傷，「兵工廠」相信會變陣出擊，重用上場英超作客大炒李斯特城嘅攻擊組合，派禾確特同阿歷斯山齊士合作攻堅。

禾確特近期腳風好順，對「李城」射入追和1球，上仗歐聯後備上陣亦建功，論把握力更喺基奧特之上，而且拍檔A山狀態全面復甦，佢上場對「李城」終於開齋，仲要入夠3粒，協助「兵工廠」大勝5比2，今場奧林比亞高斯有難喇！

奧林比亞高斯客戰靠唔住
希臘球隊向來主強客弱，奧林比亞高斯亦唔例外，上屆歐聯分組賽客場3仗全敗，面對馬德里體育會同祖雲達斯等勁旅落敗可以理解，但以0比2不敵實力平庸嘅瑞典球隊馬模實在令人失望。

奧林比亞高斯新季實力無顯著提升，新加盟嘅前鋒伊迪耶去季喺西布朗非必然正選，大軍分組賽首戰主場對拜仁慕尼黑大敗0比3，今次作客阿仙奴冇搶分之力，預期主隊可大勝一場！