西甲升班雙雄冇乜火
今晚中秋同家人朋友一齊食飯做節，不妨睇埋西甲早場賽事吖，希杭主場對貝迪斯，6點開波，時間啱啱好！兩軍都係由西乙升上嚟嘅球隊，上季兩輪對碰都係由作客一方勝出，貝迪斯今場有球星雲達華治因傷避戰，本身攻力又唔強，今場都係捧細盤為妙。

（now 632周日晚6時直播）

貝迪斯今夏有祖亞昆同雲達華治「回家」，祖亞昆係喺貝迪斯出道，今次重返母會睇怕都係等退休，雲達華治就係因為貝迪斯接近佢住喺當地嘅外婆，為咗可以陪多啲老人家，呢個「乖孫」決定加盟貝迪斯，可惜咁做未能孝感動天，上周中貝迪斯主場對拉科魯尼亞，雲達華治傷愈處子上陣，踢咗49分鐘又拉傷大腿要退下火線，真係黑到爆。其實貝迪斯今夏仲簽入雲禾夫斯雲高、韋斯達文等人，不過球隊攻力依然疲弱，5場聯賽入得3球，仲要3球都係喺主場取得，作客未入過波。希杭有後衞比拿度辛尼加坐波監，呢隊波攻力又係麻麻，近兩主場一球不入，今場對住同級嘅貝迪斯，先要避免輸波，細盤值捧。

拉科「大」騷停不了
今日阿King集中講西甲，晚上10點就有場拉科魯尼亞主場對愛斯賓奴，拉科近期入得又失得，近4場都開大，利物浦借將路爾斯阿拔圖同中場盧卡斯佩雷斯腳風頗順，今場再追大盤！

（now 632周日晚10時直播）

最後係基達菲主場對利雲特，客隊有中場華沙及魯賓加西亞因傷缺陣，球隊對上6次對基達菲，有5場開出半場和，今場不妨博一博半場和。

（nw 632周一凌晨零時15分直播）