今晚英超獨腳戲由屈福特主場鬥水晶宮，佢哋唔單止積分一樣，踢法其實都差唔多，同樣唔夠進取，成日要去到比賽末段先分到勝負。屈福特前線淨係靠恩哈路開飯，唔係好夠力撕破水晶宮大門喎！既然雙方火力都麻麻，兩隊又勁旺半場和，玩2.05倍半和最明智。

屈福特今季重返英超大家庭，季前佢哋引入咗中場祖拉度、伊天卡普爾同守將普特爾等大批新兵，磨合都要時間啦，開季幾場波邊有咁快Run得順。冇錯，陣中主力射手恩哈路近排腳風好順，連續兩場聯賽對住史雲斯同紐卡素都有貨交，兩戰合共射入3粒，但成隊波靠佢開飯，樹大招風今鋪想再搵食唔容易。之不過咁，屈福特開季至今3場主場比賽都保持不敗，當中全部開半場和，睇得出呢班波係「穩」字派，開波早段都係以穩守行先，再開多口半和有乜咁奇呀？

水晶宮近7場全開半和
作客嘅水晶宮喺柏杜執教下有板有眼，但有樣嘢值得留意，就係呢支倫敦球隊火力唔強，對上幾場聯賽入球都係一球起兩球止，王牌韋費特沙夏亦只係入咗1球咁大把，最好波嗰件卡比耶亦已經轉型擔任防守中場，火力唔弱就有鬼啦！況且水晶宮踢法比較慢熱，近7場比賽包括聯賽同英聯盃在內，全部開半場和，有咁強勁嘅數據支持，睇嚟今仗嘅劇本都差唔多。