AC米蘭今晚意甲早場作客熱拿亞，AC近兩仗贏波表現回勇，而且呢兩場波都入咗三球，可見鋒力有所加強，今仗作客面對三連敗加上一球都入唔到嘅熱拿亞，相信有力再添勝仗，AC作客小讓平半，阿謙推介上盤。

（TVB 301周日晚6時30分直播）

AC米蘭季初表現平平，所輸兩仗嘅對手正係意甲頭兩位嘅國米同費倫，輸波可以理解。不過，AC最近兩場波已見復甦，對巴勒莫同烏甸尼斯都贏波兼轟入三粒，回歸後上仗首度正選披甲嘅前鋒巴洛迪利更有入波，所以AC就算有前鋒麥巴耶尼安、文尼斯、守將阿比迪、麥薩斯等球員繼續養傷，仍有力擊敗熱拿亞。

熱拿亞除咗第二周主場贏過維羅納外，其餘賽事輸晒仲要一球都入唔到。熱拿亞上周中作客拉素輸0比2遭逢三連敗，狀態同士氣都跌到落谷底，今仗更有前鋒柏禾列迪、沙治加及門將馬迪亞比連受傷唔踢得，再加上後衞伊沙施素高同前鋒彭迪夫停賽，陣容天殘地缺嘅熱拿亞相信凶多吉少，AC作客讓平半當然撐上盤啦！