今晚有四場法甲賽事，壓軸戰由聖伊天主場對尼斯。聖伊天聯賽五連勝氣勢如虹，雖然周中要出戰歐霸盃，但以球隊現時狀態相信呢場都唔會留力。至於作客嘅尼斯剛喺上周中大炒波爾多6比1，表現令人震驚，挾住呢股氣勢作客相信唔會踢得保守，兩隊今仗隨時會駁火，阿謙推介大盤。

（TVB 302周一凌晨3時直播）

聖伊天自聯賽開咧首仗輸畀圖盧茲後，球隊喺各項賽事保持九場不敗，當中聯賽更連贏五場排喺積分榜第二，僅以一分落後榜首嘅巴黎聖日耳門。

謝明賓艾化入球停不了
聖伊天入球點分布甚廣，中場夏蒙馬同後衞盧斯佩連暫時入咗兩球係陣中嘅神射手，而前鋒路蘭洛斯、莊拿芬班巴同羅拔比歷都已經「開齋」，今仗就算有中場哥夏迪同後衞菲奧菲加夫連因傷缺陣，相信都有力喺對手身上取得入球。

尼斯上周中喺主場迎戰波爾多雖先失守，但其後發揮強大嘅後勁以6比1大破對手，前鋒謝明同翼鋒賓艾化都梅開二度狀態甚弗，球隊喺聯賽兩連勝之餘仲轟入咗九球，當中謝明仲連續兩場都有波入，相信今仗會繼續掛帥攻堅。

尼斯今季表現中規中矩，球隊踢咗七場聯賽只有一場冇波入，其中五場更開出大盤，可見呢隊波今季係大踢進攻足球，就算有中場侯爾特、守將基尼禾斯、拿馬查特以及門將普連仍在養傷，今仗都會繼續同對手鬥攻，隨時上演入球騷，一於捧大盤啦！