德甲尾場多蒙特主場迎戰達斯泰特，多蒙特上周中德甲首度失分，同時亦失去榜首寶座，後防大將曉姆斯嬲到震，賽後怒擲隊長臂章，教練杜曹為佢護航，話呢啲就係隊長嘅一團火。今晚佢哋回師三戰全大炒對手共轟入十球嘅西法倫主場，面對升班球隊達斯泰特肯定要大炒洩憤，讓球主客和多蒙特讓到兩球都冇有怕，照捧讓球主勝。

（now 670、有線61及64台周日晚11時30分直播）

多蒙特剛周中作客賀芬咸，基於兩軍球迷一向互相仇視，比賽氣氛相當緊張，多蒙特喺形勢上反客為主壓住對手踢，只可惜半場落後下只能追和無法反勝，開季三線作戰十一連勝完美紀錄告終，兼畀拜仁爬頭搶咗榜首位置，最慘仲係睇住死敵賀芬咸球迷幸災樂禍大事慶祝，唔嬲就假。曉姆斯賽後怒擲隊長臂章成為各大體育傳媒焦點，賽後佢話因為球隊把握唔到贏波機會而谷氣，相信一眾隊友都會收到呢個訊息，今晚喺主場出師實加多兩錢肉緊。

主場搵達斯泰特出氣
今季兩支升班球隊都表現神奇，達斯泰特經過六輪賽事只曾一敗，近三場亦贏咗兩場，球隊紀律同鬥心都一流，唯一敗仗係主場吞班霸拜仁慕尼黑三蛋，不過嗰場波拜仁為留力歐聯作出大輪換，全場畀達斯泰特嘅壓力唔算好大，大勝純因級數相差太遠。今晚多蒙特會精銳盡出，喺西法倫球場肯定會畀更大壓力客軍，兩軍級數分野會令到達斯泰特有心無力，想輸少啲都幾難。