近9次對碰狂轟28粒
要講熱刺近年最唔想見到嘅英超對手，曼城肯定榜上有名！咁梗係啦，熱刺近年對親「藍月亮」輸多贏少不特止，仲下下畀對手數一鑊，尤其對住阿古路就立即腳仔軟添。呢支倫敦球隊今晚英超早場鬥曼城，就算有主場之利兼受讓平半都要唔過，撐1.7倍上盤！

（now621台周六晚7:45直播）

話曼城係熱刺剋星真係不為過，先唔講熱刺近9次鬥曼城輸足8場咁一面倒，更恐怖嘅係佢哋喺呢9場波入面，足足失守咗28次，可以話係毫無抵抗力咁滯。當中曼城前鋒阿古路更係頭號剋星，呢位阿根廷射手對親佢哋例牌開餐，近7次交手一共轟入對手10球咁多，近年仲愈食愈滋味，連續4仗都攻破熱刺大門，你話熱刺冇患上「曼城恐懼症」就勢係假！

熱刺患「曼城恐懼症」
何況熱刺今季狀態麻麻，聯賽只係贏過新特蘭同水晶宮，不過對住高一班嘅曼聯就投晒降。尤其是熱刺喺上仗英聯盃畀半力出擊嘅死敵阿仙奴踢出局，搞到班粉絲勁不滿，領隊普捷天奴今仗仲邊敢喺自己地頭死守咁肉酸先？之但係想強攻曼城咩？你睇前鋒哈利卡尼繼續啞火就知難度有幾高，就算新加盟射手孫興民踢到曉飛，始終雙拳難敵四手下，怕且今仗都幾難搶分咯。

藍月亮新鐵三角夠煞食
對手曼城雖然傷兵滿營，中場大衞施華等人報稱有傷，未必趕及復出。不過富可敵國嘅「藍月亮」早就做足準備，今夏以過億歐元引入中場奇雲迪布尼、史達寧、守將奧達文迪等人，所以兵源根本唔成問題。況且前兩者同阿古路組成嘅新鐵三角威力十足，佢哋喺上仗英聯盃作客新特蘭齊齊士哥，今晚作客熱刺呢位好客主人家，梗係又食又拎開大餐啦喂！