維拉獲利送羅渣士一程

利物浦今季季前繼續花成億鎊掃貨，但換嚟嘅係開季聯賽6戰只得8分嘅劣績，加上周中英聯盃對乙組仔卡素爾都只能靠射贏12碼晉級，難怪紅軍主帥羅渣士被炒嘅呼聲愈嚟愈高。利物浦今晚主場對住近年造訪晏菲路都有分落袋嘅阿士東維拉，阿謙睇死紅軍都係搞唔掂維拉，捧讓球客勝。

（now 623周六晚10時直播）

紅軍咁羞家，據講高層已忍無可忍，如果未來10日緊接嘅3場比賽再冇起色，球會就會即刻革扯「羅帥」。英國天空博彩似乎都知道羅渣士聞到「魷魚香」，將佢嘅被炒魷賠率由2倍大幅下調到1.57倍，成為英超最快被解僱領隊嘅大熱門。

紅軍今晚主場迎戰維拉，將缺少上仗英聯盃傷出嘅前鋒羅拔圖法明奴同後衞洛夫雲，加上仲養緊傷嘅前鋒賓迪基、中場佐敦軒達臣，陣容超殘。維拉有主力艾邦拉荷缺陣，但仲有佐敦阿休同基亞利殊等，實力唔算太曳，今仗大有機會成功搶分，同時送羅渣士「上路」，一於捧維拉讓球客勝。