曼城食刺翻尋味

英超早場有好戲睇，熱刺主場大戰曼城。榜首嘅曼城上場聯賽畀韋斯咸破咗不敗金身，好彩跟住有場英聯盃對新特蘭畀佢哋極速反彈，最緊要係王牌阿古路健健康康可以上陣，今場作客照樣捧得過，「藍月亮」近9次對熱刺贏咗8次，1.81倍嘅客勝有買趁早！

（now 621周六晚7時45分直播）

熱刺上季彈出個「哈神」哈利卡尼，今季佢由神做番凡人，各項球會正式賽事都未開齋，狀態同信心都低迷，反而新兵孫興民表現搶鏡，喺歐霸盃梅開二度後，上場聯賽對水晶宮更靠佢一箭定江山贏波。不過熱刺呢隊波無論投放咗幾多錢去增援，同曼城、車路士、阿仙奴呢啲勁旅相比，級數總係差啲，就好似「扶不起的阿斗」咁。熱刺今季遇強即屈，開咧戰對曼聯、英聯盃對阿仙奴，都係輸波而回，今場對住剋星曼城，更係凶多吉少。

「藍月亮」曼城對上9次對戰熱刺贏咗8次，擺到明係食住佢哋，前季兩輪比賽分別大炒熱刺6比0同5比1，上季亦炒過對方4比1，話熱刺畀曼城炒到驚真係冇吹水！「藍月亮」嘅食「刺」高手阿古路今場有望繼續正選上陣，曼城近4次全勝熱刺，「阿古獸」4場都有波入，一共入咗8球，上季主場大勝4比1佢更食出大四喜，真係勁「識食」！

4場入8球「阿古獸」又開餐
曼城今場雖然有大衞施華同拿斯尼因傷上陣成疑，不過兩大新兵史達寧同奇雲迪布尼已經極速融入球隊，史達寧突破力強，迪布尼就助攻、遠射瓣瓣有，絕對可以頂替前兩者嘅角色，有佢兩個喺度，「阿古獸」今場又可以開大餐喇喂！