華倫掛住歐聯
今晚西甲有場獨腳戲，由華倫西亞喺主場恭候CF格蘭納達。「蝙蝠兵團」牌面係就係秤先，弊在佢哋有星級守將荷西加耶同新紮門神馬菲賴恩打咗柴，加埋歐聯跟尾，今鋪未必搞得掂矢志搏反彈嘅格蘭納達，捧2.72倍「讓球客勝」最明智。

（now632台周六凌晨2:30直播）

華倫西亞今季要應付西甲同歐聯兩大戰線，以佢哋嘅兵源嚟講其實幾吃力，最濕滯係會方將阿根廷守將奧達文迪賣畀曼城之後，澳洲籍門將馬菲賴恩又傷埋，加埋迪亞高艾維斯養緊傷，主帥紐奴焗住要用3號門將約艾洛迪古斯把關。盛傳被車路士睇中嘅左閘荷西加耶右腳小腿受傷，今仗出唔出得只係五五波，華倫西亞條後防真係甩皮甩骨。

蝙蝠兵團近7戰僅1勝
計埋歐聯在內，「蝙蝠兵團」近7仗只係贏過1場，近況沉到爆。況且歐聯分組賽下周中將會進行次輪賽事，華倫西亞周三凌晨造訪里昂，唔排除教練紐奴會收起部分主力喺歐聯戰場搏殺，今晚鬥格蘭納達戰意成疑。

格蘭納達近況一樣咁衰，聯賽3連敗之餘，上仗對住皇家蘇斯達都要吞3蛋，真係咩面都冇晒。賽後主帥辛度禾爾鬧隊波係「冇頭公雞」，落到場手騰腳震唔知想點；中場指揮官魯賓洛堅拿亦以「屈辱」嚟形容呢場慘烈敗仗。相信一班手足唔會再咁衰仔，實會希望做番齣好戲挽尊嚴，今場造訪有歐聯跟尾兼人腳唔齊嘅「蝙蝠兵團」，唔搶分等幾時先？