皇馬開火射爆畢爾包

C朗挑戰魯爾紀錄
仲爭3球，C朗就可以成為皇家馬德里史上「冧巴溫」射手，今晚西甲快車開動，「銀河艦隊」造訪畢爾包，呢位葡國「萬人迷」肯定當畢爾包係沙包，省爆佢哋都似！皇馬作客讓狀態低迷嘅畢爾包半一，梗係捧1.75倍上盤啦！

（now633台周四凌晨3:00直播）

人人都以為C朗上仗就可以破士哥紀錄，但皇馬上輪聯賽只係以1:0小勝CF格蘭納達，贏又贏得少，C朗又冇份入波，都唔知令幾多Fans失望呀！不過唔緊要，機會今晚又嚟喇，事關對手畢爾包，自從季初做低巴塞隆拿捧走西超盃之後，表現突然大跌Watt，最近4場波仲勁失7球，防線好弱雞喎，點頂得住C朗呀？況且畢爾包食粥食飯都係靠老將射手阿度里斯，樹大招風，邊有咁易搵到食吖？

拿華斯今仗不失 即超越聖卡斯
根據西班牙賽會官方統計，C朗已經累積為皇馬攻入321球，只要今仗整個帽子戲法，就可以超越魯爾（323球）成為「艦隊入球王」。仲有呀，連埋佢喺士砵亭、曼聯同葡萄牙國家隊嘅入波，C朗職業生涯已經入咗499球，爭1球就達500球大關。兩大入球紀錄等住C朗，佢今晚肯定加多兩錢肉緊。

除咗C朗之外，門將基羅拿華斯都好叻仔，呢位哥斯達黎加籍門將頭4場聯賽保持不失，今晚頂多71分鐘就可以締造「銀河艦隊」喺聯賽史上嘅最長不失球開季。兩大球星都要攞彩，今鋪梗係唔衰得啦！