意甲周中開快車，AC米蘭今晚打頭陣，作客烏甸尼斯。AC今季換帥增兵，但成績並冇特別改善，皆因防線仍然不穩。唯一值得安慰係兩位新加盟前鋒卡路士巴卡、雷斯阿祖安奴表現對辦，以「紅黑兵團」有前冇後嘅風格，最好揀入球大。
（TVB301周三凌晨2時45分直播）
紅黑兵團有前冇後
AC豪花3,000萬歐元向西維爾收購卡路士巴卡，呢位哥倫比亞國腳以行動證明自己物有所值，上仗聯賽梅開二度，協助AC以3比2擊敗巴勒莫，今季4場聯賽已有3球進帳。不過「紅黑兵團」集中資源提升中前場實力，卻忽略防線人腳質素，搞到4戰失6球，比入波仲多，成為球隊未能進身前列嘅主因。AC今仗最終能否全取3分，的確好有疑問，但入波機會應該相當高。
烏甸尼斯自首輪爆冷擊敗祖雲達斯之後，近3仗全敗，不過佢哋近3次主場對AC全勝，唔可以低估烏甸反彈嘅可能性。會方今季向拿玻里借用嘅杜雲沙柏達上仗開齋，今仗同同胞卡路士巴卡鬥射術，入波唔會少。
