英超哀兵盃賽狹路相逢
英聯盃嚟到第3圈賽事，出現唔少英超球隊互撼嘅戲碼，兩支啱啱喺聯賽輸波嘅球隊，新特蘭同曼城今晚會狹路相逢。「黑貓」新特蘭現時喺英超仲未開齋，上圈英聯盃對住低組別球隊雖贏波，但竟被對手攻入3球，防線明顯有問題，加上球隊現時應該要專心踢好聯賽，今晚主場面對上仗意外輸波急欲反彈嘅「藍月亮」，相信都係凶多吉少，阿謙睇好曼城可大勝一仗吐烏氣，捧讓球客勝。

（周三凌晨2時45分開賽）

新特蘭開季表現未如理想，唔計上圈聯賽盃大勝晉級，踢咗6場英超只係錄得2和4負嘅成績，同「死對頭」紐卡素一樣排喺榜尾。「黑貓」前線有迪科爾、謝明蘭斯、托禾倫同波連尼在陣，球隊嘅入球能力其實唔錯，但防線表現就非常曳，開季7場到而家失咗16球，平均每場失逾兩球。

新特蘭防線穿窿場場失波
新特蘭上圈英聯盃面對低組別球隊埃克塞特竟被對手攻入3球，雖然最終大勝6比3，但防線演出難予人信心。「黑貓」今仗有奧沙、鄧肯禾特摩亞及阿當馬菲斯唔踢得，加上球隊依家排喺英超榜尾，相信會留力專心護級，今仗應該唔會出全力應戰。

曼城上仗主場以1比2不敵韋斯咸，球隊開季全勝紀錄被打破，上下自然心有不甘。「藍月亮」上仗輸波相信係由於上周中要踢歐聯，令到一眾球員體力有所影響，加上陣中唔少主力受傷缺陣，先畀韋斯咸有機可乘。不過，曼城球員始終身經百戰，經過上場調整後，相信今仗會多兩錢肉緊，加上新加盟嘅比利時中場奇雲迪布尼上場「開齋」，縱然文加拉、高柏尼、大衞施華等球員因傷唔踢得，但球隊一向以二線兵爭聯賽盃，佢哋要爭取領隊比歷連尼賞識，肯定肉緊。阿謙睇好「藍月亮」可以大勝一仗，捧讓球客勝。