今晚英冠獨腳戲，打比郡主場對般尼，兩隊都係升班熱門，雙方近況都不俗，不過科娜今次就撐般尼，因為佢哋陣中有個改邪歸正嘅「流氓射手」安達格雷，呢個蠱惑仔喺新一季加盟般尼後踢到曉飛，最近仲協助新東家取得四連勝，般尼今場受讓捧得過呀！

（TVB 301周二凌晨2時45分直播）

般尼今季失去王牌前鋒丹尼艾格斯，球隊一時適應唔嚟，搞到聯賽開季頭三場不勝，好彩安達格雷不枉般尼今夏用破球會轉會費紀錄600萬鎊（約7,222萬港元）將佢由賓福特買返嚟，佢大踢身價波，最近兩場更貢獻一球及兩次助攻，絕對係般尼連贏四場嘅功臣。

唔講唔知，除咗拜仁慕尼黑球星列貝利，其實安達格雷都係「疤面煞星」，呢位24歲射手自細做童黨，四年前更因「開片」被劈傷，搞到左邊面頰有四吋長刀疤，死裏逃生嘅佢之後改過自新，11至12球季喺盧頓打響名堂，若然佢今季可以幫般尼升班成功，隨時成為另一個丹尼艾格斯，加盟大球會都唔定呀！

打比主力缺陣讓唔起
打比郡對上兩場贏波並非贏得好有說服力，對升班球隊普雷斯頓贏係應該，而對雷丁一戰，若非對方上半場有球員被逐，打比郡都難全取三分，球隊今場仲有天才中場韋曉士同隊長拜阿迪缺陣，一於撐受讓嘅般尼喇！