今晚二線波做主打，阿King睇中葡超直播戲碼，由「二哥」士砵亭主場迎戰國民隊，前者於歐霸盃出師不利，令今季從賓菲加「叛逃」士砵亭嘅主帥佐治捷西斯備受壓力，撞正實力平平嘅國民隊，正好迎來反彈良機，士砵亭讓球勝咪錯過。

（有線155台周二凌晨4時直播）

雖然貴為葡超Big 3，但士砵亭近年戰績遠遜波圖同賓菲加，今季佢哋的起心肝，撬走上季帶領賓菲加於聯賽封王嘅主帥佐治捷西斯，由於雙方為同市死敵，令佐治捷西斯從賓菲加救世主變成叛徒；最慘係士砵亭先喺歐聯附加賽被莫斯科中央陸軍踢出局，日前於歐霸分組賽首輪又不敵莫斯科火車頭，令呢位教頭壓力大增。因此，士砵亭要將注意力集中於聯賽，佢哋現時位居次席，據報上仗後備入替嘅射手施利文尼，今仗有機會復任正選，面對開咧後作客兩連敗、近四次交手輸咗三次嘅中游分子國民隊，係時候大勝一場止蝕，不妨直取士砵亭讓球勝。

奧雷布洛有火受讓筍
至於瑞典超奧雷布洛主場對艾夫斯堡，後者有中場莫碧克、巴拉美及守將鍾莊臣倦勤，實力大削。奧雷布洛亦要為護級搶分，挾近四仗不敗之勢，加上近兩次主場對艾軍全勝，仲有得受讓值得捧場。最後阿甲貝格拉諾主場對拉費爾拿，兩隊剛於上輪聯賽交手打和，而貝格拉諾上周中踢完南球盃，體力較輸蝕，拉費爾拿亦唔敢輕舉妄動，佢哋近六仗五開半場和，值得追多鋪。