意甲今晚有場大戰，由拿玻里主場迎戰拉素。拿玻里今季改由沙利領軍，開季3場聯賽不勝表現失望，好在佢哋周中歐霸盃大炒布魯日，迎嚟沙利上任後首場勝仗，球員信心返晒嚟，加上射手希古恩近兩季做咗「拉素剋星」，有權揮低拉素拎3分，捧1.72倍主勝！

（TVB301周一凌晨2:45直播）

希古恩專恰藍鷹
上季拿玻里喺煞科戰輸畀拉素，直接將歐聯附加賽入場券送畀對手，今戰梗係想報仇啦！雖然拿玻里開季3戰不勝，不過佢哋喺歐霸盃5球大炒布魯日後，沙利同班球員都鬆口氣，更何況射手荷西卡利祖省兩粒重拾射門鞋，仲有近2季聯賽4戰拉素獨取8球嘅「剋星」希古恩，反底唔奇喎。

「藍鷹」拉素喺歐聯外圍賽出局後，轉戰歐霸盃表現唔算托弗，上周中遠征烏克蘭作客迪尼普打和1:1，球員體能上輸蝕，最慘係三線主力高路斯、碧基亞、迪維積唔出得，戰鬥力大打折扣，作客頂唔住回勇嘅拿玻里。