增兵護級 VS力爭冠軍
松本山雅急住增兵搶分護級，大阪飛腳亦要力爭日職次階段冠軍，兩隊今日响松本平廣域公園綜合球技場交鋒，簡直係火星撞地球，飛腳1.61倍客W固然穩陣，想好分些少不妨改玩1.82倍入球大。

（有線61、201周日下午1:00直播）

松本山雅喺首階段排尾4，家陣次階段更加跌到落尾2，再唔發力就要來季日乙再見，呢支資源有限嘅球隊為咗生存，最近由英甲嘅韋根手上，簽咗前南韓國腳中場金甫炅，雖然佢由5月起冇打過正式比賽，不過質素唔曳，依家只得七、八成狀態都幫到隊波，松本上場作客1:1打和湘南，連續3場不敗，金甫炅表現唔錯，只係體力仲差咗啲，頂唔足全場，但係松本嘅中場整體攻守都有改善。

宇佐美貴史抖夠搏殺
比較唔好彩嘅係，松本今場對住當旺嘅飛腳，呢支大阪勁旅剛啱喺亞冠盃8強次回合3:2險勝韓職豪門全北汽車，4強將會迎戰中超霸主廣州恒大淘寶，雖則佢哋畀人睇低半線，不過呢個成績對飛腳起咗好大嘅鼓舞作用，而且前鋒宇佐美貴史响亞冠盃場波停賽，抖足抖夠可以全力搏殺，對松本嚟講真係非常不利。由於飛腳過去3戰松本2勝1和未輸過，半場實有波入，入球大都值得兼投。