祖雲達斯今季意甲3戰不勝，令人大跌眼鏡，但相信只係「技術性調整」啫。祖記上周中歐聯反勝曼城2比1贏得精彩，以佢哋深厚根基應該開始反彈，今晚作客熱拿亞，祖記係時候喺聯賽開齋，客W1.75倍值博。

（TVB 301周日晚9時直播）

熱拿亞天殘地缺
祖雲達斯踢咗3場聯賽1和2負，成績走晒樣，好大程度上因為派路、維達爾及泰維斯離隊。不過呢支意甲3連冠始終有料，上仗歐聯作客對大勇嘅曼城都能反勝，新加盟射手文迪蘇傑入波，同隊友建立起默契，加上中場保羅普巴狀態有改善，相信祖記將重回正軌。

熱拿亞級數同祖記有明顯距離，雙方近4次交鋒熱拿亞輸咗3次。加上兩位射手沙治加比、柏禾列迪及門將馬迪亞比連等七位主力受傷倦勤，殘陣出擊更加冇得鬥。