上季法甲亞軍里昂喺上周中歐聯曳到爆，作客對住同組最弱嘅真特，喺打多兩個嘅情況下只能打和1比1，而罪人正正就係前鋒拿卡錫迪，佢喺比賽尾段射失12碼，搞到球隊贏唔到。里昂士氣大受打擊，今場法甲作客馬賽，識捧梗係捧連續兩場取得大勝嘅馬賽，主隊讓平半捧上盤！

（TVB 302周一凌晨3時直播）

新帥米高有料到
拿卡錫迪上季喺法甲為里昂出戰33場射入27球，但今季頭5輪仲未開齋，狀態極之低迷，上場歐聯連12碼都可以射失，信心已跌落谷底，而入咗4球嘅中場費基亞又繼續養傷。馬賽上季兩戰里昂都贏唔到，今場絕對係復仇好時機，球隊開季兩連敗，皆因主帥比爾沙無啦啦辭職打亂晒計劃，經過幾場適應期，球隊喺新帥米高帶領下漸入佳境，上場聯賽大勝巴斯蒂亞4比1，跟住喺歐霸作客又贏格羅寧根3比0，依家士氣高昂，要贏里昂唔難吖！