拒感情用事 反番安玻里
周中歐聯激戰連場，尤其係幾支意大利球隊幫肥叔執唔少，既然咁旺，因此今日重心場次，決定繼續推介意甲賽事，由烏甸尼斯主場迎戰安玻里。安玻里雖然上周帶挈肥叔贏錢，不過賭波嘅嘢一場還一場，而且烏甸近況一般下依然要讓波，足智彩嘅主Ｗ賠率，明顯低於其他博彩公司，似乎有計，上盤不妨入番多少。

（TVB 301周日凌晨零時直播）

由於呢輪大戶冇運行，搞到冇咗個買波指標，肥叔惟有靠自己努力度波。歐聯分組賽啱啱周中揭開序幕，市場氣氛都幾熱鬧，當中巴塞作客羅馬之役，前者上半場中段已先開紀錄，嗰陣呢支上屆盟主仲要讓半球咁多，你當羅馬係流嘅咩，肥叔睇準時機買入下盤，冇耐呢支意甲勁旅就靠一球舉世矚目嘅世界波扳平，真係慢少少都買唔到，最終「雌狼」守住城池，令肥叔個下盤袋袋平安。

如果有睇開呢個專欄嘅讀者，都會留意到肥叔近期買意大利波，特別得心應手，上周推介安玻里嘅下盤中到應一應，呢班波今晚又出動，於意甲作客烏甸尼斯。肥叔貼波不嬲唔會感情用事，安玻里上周贏盤，全因對手拿玻里近況差兼讓得太辣，雖然烏甸連輸兩場，但睇番足智彩除咗開出佢哋讓平半八五水之餘，其主客和嘅主Ｗ被質到得2倍，與出面嘅博彩公司如威廉希爾（2.15倍）、立博（2.2倍）、明陞（2.26倍）相比明顯偏低，加上近4次交手錄得3勝1和佳績，肥叔認為烏甸屬坐和望贏格局，讓平半值得以半個盤博贏晒成個盤。

「狐狸」鬼盤氹你落疊
至於英超史篤城主場對「狐狸」李斯特城，後者上周反勝維拉氣勢如虹，面對未嘗一勝嘅史篤城，要讓波都唔算過分，不過大部分莊家都開出平手盤，而且「狐狸」仲要有逾2倍高水，邊有咁大隻蛤乸隨街跳，擺明係搭定個棚等你買「狐狸」，肥叔偏偏唔信，反其道而行買番史篤城好過。

（now 623周六晚10時直播）