榜首嘅曼城今晚主場對韋斯咸，「藍月亮」啱啱喺周中歐聯主場反輸祖雲達斯，畀外界瘋狂恥笑唔識踢歐戰，今場對住私房菜韋斯咸，仲唔將成肚氣發洩喺「錘仔幫」度咩？曼城今場仲有阿古路強勢復出，讓球主勝得番1.57倍都照捧場！

（now 621周日凌晨零時30分直播）

阿古路掛帥攻力保證
曼城今場有後防3大主力高柏尼、薩巴列達同基捷基治，以及中場戴爾夫因傷缺陣，不過「藍月亮」勝在兵源充足，每個位置都有人補到位，最主要係兩大不可或缺嘅核心阿古路同大衞施華都可上陣，加埋新人王奇雲迪布尼校炮，真係唔使驚贏唔到韋斯咸。上場對祖記被插爆嘅史達寧冇錯把握力係麻麻，但佢突擊能力超強，幫手拉開防線，為其他隊友製造空位。曼城過去7次主場對韋斯咸全勝，其中最近3場都贏到兩球或以上，讓球主勝真係捧得過。

韋斯咸今季換咗比歷領軍，攻力的確有改善，作客仲贏過阿仙奴同利物浦，威水到震。不過今場對手係實力再高一級嘅曼城，見到「錘仔幫」咁勁揪，你估「藍月亮」會敢輕敵，畀佢哋爆冷咩？韋斯咸試過對般尼茅夫都失4球，後防唔及上季咁硬淨，加上近季一直被曼城食住，今場作客可謂輸少當贏。