德甲獨腳戲緬恩斯主場鬥賀芬咸，兩軍級數旗鼓相當，但近況各有差異，緬恩斯經首輪不敵恩高斯達特後迅即進入狀態，近三輪賽事演出可人，相反賀芬咸今夏換血後仲需要時間重新夾過，現階段所見攻不銳守不穩，有主場之利嘅緬恩斯值得睇高一線，小讓平半宜捧上盤。

（now 670、有線61及201台周六凌晨2時30分直播）

武藤嘉紀醒過古蘭爾
兩軍今季都起用新箭頭，但表現同狀態明顯差異甚大，緬恩斯嘅日本新星武藤嘉紀去到第二輪至攞到正選，不過呢位當起嘅23歲球星迅即融入德甲同球隊，除咗對漢諾威梅開二度外，喺前線嘅活躍範圍甚廣，配上幾位90後進攻中場尤路斯馬爾尼、基斯甸基文斯、同上仗抖咗一場後將復出嘅查路森巴利奧，進攻線活力十足，雖然上仗作客史浩克惜敗而回，但表現一啲都唔失禮，場波踢得相當接近，緬恩斯甚至有機會攞分，今仗回師主場遇上態沉對手，可望重響勝鼓。

賀芬咸前線失血多
賀芬咸季前失血甚多，隊長安達斯碧克轉投比錫達斯令佢哋中後場失去重心，前線仲一口氣冇咗羅拔圖法明奴、莫迪斯迪同舒普洛克，前線要重新夾過，新加盟嘅古蘭爾闊別德甲5年後遲遲未能重拾狀態，表現相當低迷，雖然開咧兩仗對勁旅利華古遜同拜仁演出尚算雖敗不辱，但近兩仗遇上較弱對手時，教練基斯度嘅主攻踢法根本冇具分量前鋒配合，今晚作客睇低一線。