經過一輪歐聯同歐霸激戰後，今日各地聯賽又重響戰鼓，其中法甲獨腳戲雷恩主場對里爾值得留意。前者雖然位居次席，但呢班波習慣慢熱睇定嚟食，撞正穩陣行先嘅里爾，初段隨時鬥拉鋸唔敢亂嚟，半場和非常值博。

（TVB 302周六凌晨2時30分直播）

雷恩今季異軍突起，自首輪遭巴斯蒂亞反勝後，聯賽連贏4場，令人眼前一亮。雖然開局咁順，但雷恩今季嘅特點係比較慢熱，唔會急於入波，等待對手後防出現漏洞，先嚟個致命一擊，因此連續4仗開出半場和。由於守將卡華利、沙迪同門將哥斯迪仍受傷患困擾，雷恩為免令後防暴露更多空位，初段拖慢節奏嚟踢絕不出奇。

另一邊廂里爾今夏除咗奧歷治被利物浦回收外，另一前鋒洛迪連亦改投卡昂，中場主力馬雲馬田又未好番，火力大減下，惟有改踢守勢波，開咧5戰入得1粒咁大把，但只失1球，防線頂得兩嘴。睇番里爾之前面對里昂、波爾多、摩納哥及巴黎聖日耳門等勁旅，都奉行拉鋸策略，而呢4場全部開出半場和，預計今仗作客「二哥」雷恩會照辦煮碗，初段好大機會悶戰一場，既然雙方咁旺半場和，不妨追多鋪。

弗賴堡腳風順贏「德」
至於德乙方面，次席弗賴堡主場對比勒費爾德，前者射手尼斯彼德臣近兩仗都有進帳，今季聯賽已累積6個士哥，腳風勁順，有力輕取對手。

最後西甲「兩弱相遇」──基達菲主場對馬拉加，馬拉加辛達告魯斯、法維奧費拉拿等主力做晒「十字兵」，咁蹺近6次碰頭都係旺主勝，可博基達菲贏波反彈。

（now 632周六凌晨2時30分直播）