今晚大家嘅注意力都集中喺歐聯賽事，但阿King就睇中聽朝3場美職賽事，其中紐約城喺主場對FC多倫多，兩軍狀態同樣麻麻，加上陣中都有唔少傷兵，無疑對雙方攻守都有影響。其實兩軍近期都處於入得又失得嘅狀態，今仗對決隨時上演入球騷，阿King捧大盤。

（TVB 301周四早上7時30分直播）

現時排東岸第9嘅紐約城，喺日前輸畀FC達拉斯後，距離季後賽可以話係愈來愈遠，加上近期連串不濟嘅表現，球隊士氣難免低落。紐約城近7場聯賽只係贏得1場，但球隊其實係有能力入到波，只因防線欠穩先導致成日失波，今仗繼續有佐治約翰、東尼泰萊同伊拉奧拿唔踢得，相信會延續近期入得又失得嘅情況。

至於目前排喺東岸第5嘅FC多倫多，日前不敵競爭對手新英倫革命可以話打擊甚大，因為後者已進佔東岸第4，令FC多倫多嘅壓力唔細。FC多倫多攻力同樣唔錯，不過又係衰後防表現太差，上仗先有後衞柏基斯擺烏龍送禮，再有中場米高巴特利喺禁區內誤傳累球隊輸波。FC多倫多近12場聯賽都開出大盤，就知呢班波一樣攻強守弱。今仗兩軍後防亂鬥亂，隨時出現大手交易，一於捧入球大。

地震傷疲困擾益衝擊
另外兩場美職賽事，革命近5場聯賽贏晒狀態大勇，但球隊今仗有中場悍將鍾斯坐波監，要擊敗排喺東岸榜首嘅紐約紅牛絕非易事，平手盤阿King捧紅牛。（TVB 302周四早上7時30分直播）而聖荷西地震連續兩場贏唔到狀態似有所回落，加上球隊有多達7名傷兵唔踢得，面對有杜奧巴加盟後表現明顯有改善嘅蒙特利爾衝擊，相信唔係咁易擊敗對手，捧衝擊讓球客勝。

（TVB 301周四早上10時30分直播）