歐聯分組賽又邊少得皇馬先？「銀河艦隊」今晚喺A組主場迎戰烏克蘭對手薩克達，呢支西甲班霸今季搵嚟戰術大師賓尼迪斯揸旗，經改造後球隊愈Run愈順，攻守兩端均有高水平演出，就算呢鋪讓到2球，都照撐2.2倍「讓主」。

（有線62及202周三凌晨2:45直播）

BBC組合3戰入9球
皇馬經過季初摸索期後逐漸上力，改踢進攻中場嘅加里夫巴利，上仗對愛斯賓奴交出2次助攻同博到個12碼，睇嚟已經適應好新位置。至於王牌C朗更威風，上仗整場五福臨門戲碼畀大家歎，令BBC組合今季3戰合共轟入9球，火力勁得人驚。何況隊友基羅拿華斯亦唔輸蝕，成為皇馬40年嚟首位聯賽開季後3戰未有失守嘅門將，呢支「新艦隊」攻守都咁堅，家陣唔適宜同佢哋作對囉！

薩克達火力疲弱
至於對手薩克達，今季有鋒將雷斯阿祖安奴、杜格拉斯哥斯達離隊，但前線僅補入踢過阿仙奴嘅老將伊度亞度達施華，咁嘅火力想破蛋並唔容易。咪忘記呢班波上屆歐聯16強次回合，作客拜仁慘吞7隻光蛋返歸，今鋪對住同樣攻守兼備嘅「銀河艦隊」，輸多鋪杰嘅有咩咁出奇先？