英超周二凌晨上演獨腳戲，韋斯咸主場鬥紐卡素，「喜鵲」教頭麥卡倫8年前畀韋斯咸主帥比歷累到失業，仇人見面肯定鬥得精彩！韋斯咸今季踢法「性感」，近3仗都開出入球大，今場可追大盤。

（now 621周二凌晨3時直播）

卡路爾候命倒戈
英格蘭08年歐國盃外圍賽關鍵戰役主場輸畀由比歷帶領嘅克羅地亞，緣盡歐國盃，三獅主帥領隊麥卡倫之後被炒。8年後兩人喺英超重逢，比歷賽前話同情麥帥當年被炒，讚對方重新振作。麥卡倫就話比歷係帶領韋斯咸嘅理想人選，表面無乜嘢，實質麥帥必定想贏波報番被炒之辱。

紐卡素聯賽4戰不勝，今場更有箭頭阿歷山大米祖域坐波監，睇嚟形勢麻麻。不過球隊季前引入韋拿杜姆同泰奧雲等優質球員，面對防守不穩嘅韋斯咸，有條件爭取入球。

韋斯咸賽前傳出安祖卡路爾可候命，呢位高大中鋒倒戈出戰，同樣會加多兩錢肉緊。韋斯咸近3仗入7球失6球，迪亞法沙高、蘭仙尼及皮耶等上晒力，今場鬥紐卡素有望演入球騷。