米蘭雙雄打吡愛鬥大

意甲今晚重頭戲上演米蘭打吡，國際米蘭主場對AC米蘭，兩大褪色豪門今季都大事增兵，力圖中興。國米借用曼城前鋒祖維迪，憑佢包辦3個入球，聯賽兩戰全勝。AC亦唔輸蝕，兩位新簽南美射手卡路士巴卡、雷斯阿祖安奴上輪各建1功，表現相當對辦。米蘭雙雄都裝備鋒利箭頭，勢必搏槌攞威，首選入球大。

（TVB301周一凌晨2時45分直播）

前線齊添兵軍備競賽
國米今夏買人好闊綽，包括豪花3500萬歐元收購摩納哥中場干度比亞，早前再以2000萬歐元簽下禾夫斯堡翼鋒比列錫。現時表現最出色新兵係曼城借用祖維迪，呢位黑山國腳曾効力費倫天拿5年，對意甲非常熟悉，所以一加盟國米即迅速入局，兩場聯賽入3球。至於剛來投嘅克羅地亞國腳比列錫，今仗有望首次披甲，呢位翼鋒傳射能力俱佳，可望增加球隊鋒線活力。國米教練文仙尼準備排出433陣式，以祖維迪、比列錫、柏拉斯奧打3箭頭，強攻AC，應該有睇頭。

AC今季改由米赫洛域執教，佢球員時代効力過國米，亦曾於國米擔任文仙尼副手，對對方戰術非常熟悉，隨時一開波就先發制人。事實上，AC簽下卡路士巴卡、雷斯阿祖安奴之外，鋒線實力大增，加上仲有本田圭佑後上攻門，AC中前場人才濟濟，有足夠本錢同國米駁火。