恰到黑貓上心口
新特蘭今晚喺英超主場對熱刺，受讓半一都博唔過，因為新特蘭領隊艾禾卡特唔止同射手迪科爾反面，仲同老細搞對抗威脅離隊，搞到淪落為英超最快被炒魷領隊大熱門，至關鍵係對家熱刺連續10次對賽不敗，上盤值得支持！
（now621台周日晚8:30直播）
上季新特蘭喺艾禾卡特帶領下驚險護級成功，但佢明顯撈得唔開心，曾經試過公開鬧射手迪科爾唔肯以翼鋒身份落場，講明對方唔想踢就咪踢。大佬呀，話晒迪科爾都係英格蘭國腳級球星，突然無厘頭要佢做翼鋒，睇得出艾禾卡特極權嘅一面，相信呢件事會嚴重打擊新特蘭嘅內部士氣，加上佢哋條防線好似細路仔玩泥沙咁，點捧得過呀？
新特蘭新援唔掂
仲有，艾禾卡特開季後冇耐，已經試過公開鬧老細出手奀，唔肯燒錢買人，要脅再唔買人就離隊。雖然新特蘭喺轉會市場關閉前以1,000萬鎊（約1.2億港元）收購利物浦前鋒波連尼，又成功借用雷恩前鋒托禾倫，但佢哋1個長期坐冷板，1個質素有限未必踢得掂英超，睇怕艾禾卡特都撈唔長，英國天空博彩仲將佢列為英超最快被炒魷領隊大熱門（3倍）添！
孫興民絕非花瓶
另一方面，熱刺開季後得3和1負，表現完全唔合格，所以緊急簽入利華古遜前鋒孫興民做救兵，佢連歐聯都踢得掂，去到白鹿徑絕對唔會齋做擺設，隨時帶挈埋留隊嘅射手哈利卡尼翻生。更何況，近10次對賽熱刺有7勝3和，簡直恰到「黑貓」上心口，就算中場基斯甸艾歷臣同迪比利未好番都唔怕，一於博熱刺發威打開勝利之門。
