今晚英超兩場大戰，日韓「隔空PK」成為矚目焦點，啱啱加盟熱刺嘅南韓國腳孫興民，挾住英超史上身價最高嘅亞洲球員之名，大家都期望佢能帶領新東家作客新特蘭，打破開咧不勝困局。另一邊廂，有日本箭頭岡崎慎司壓陣嘅李斯特城，於尾場迎戰阿士東維拉，呢位「拚命三郎」一向唔輸得，且看佢能否喺呢場日韓「隔空PK」入波攞彩？

熱刺今晚英超作客砌包尾嘅「黑貓」新特蘭，後者領隊艾禾卡特同老細搞對抗威脅離隊之餘，仲同前鋒迪科爾擘晒面，士氣唔慌好得去邊，相反熱刺新兵孫興民弗到漏油，處子戰誓要爭取表現冧粉絲，射手哈利卡尼剛於國際賽打破入球荒，加上連續十次對賽未輸過，就算讓半一都值得捧場！

（now 621周日晚8時30分直播）

新特蘭將帥不和
上季新特蘭喺艾禾卡特帶領下驚險護級成功，但佢明顯撈得唔開心，開季後冇耐已經公開鬧老細唔肯畀錢買人，要挾再唔買人就離隊。雖然新特蘭喺轉會市場關閉前以1,000萬鎊收購利物浦前鋒波連尼，又成功借用雷恩前鋒托禾倫，但佢哋唔係雪到硬晒，就係質素有限。艾帥嫌球隊唔夠亂，曾公開鬧射手迪科爾唔肯以翼鋒身份落場，講明對方唔想踢就咪踢，依家阿當莊臣及祖迪高美斯仲養緊傷，前線極倚賴迪科爾數胡，咁樣公開擘面，迪科爾仲點會同你賣命呢？「黑貓」本身實力一般，依家連士氣都咁差，難怪開咧四戰不勝兼失十粒排包尾啦。

熱刺開季後得三和一負，表現完全唔合格，緊急出價3,000萬歐元，從利華古遜簽入南韓新貴孫興民救亡，令佢成為史上最高身價亞洲球星，打破日本國寶中田英壽喺01年由羅馬轉會帕爾馬嘅2,840萬歐元轉會費紀錄。孫興民跟手為南韓國家隊連續兩場世盃外圍賽入波，包括對老撾連中三元做見面禮，南韓傳媒更形容佢做「孫拿度」添。孫興民啱啱攞到工作證，今仗將會處子登場，佢咁弗實帶旺新東家。

哈利卡尼搵番射門鞋
除此之外，今季聯賽未開齋嘅前鋒哈利卡尼，剛替英格蘭於歐國盃出戰聖馬力諾同瑞士都有士哥，打破開咧後嘅入球荒，信心返晒嚟，呢位熱刺射手重新撻着，拍住「孫拿度」於前線搏殺，實搞到新特蘭防線立立亂。況且近十次對賽，熱刺錄得七勝三和不敗佳績，擺明食住呢隻「黑貓」，今仗仲唔係打開勝利之門嘅好時機，讓半一都要捧場。