阿甲今輪上演超級打吡大戰，由河床喺主場迎戰小保加。河床自贏完南美自由盃後狀態低沉，更有幾位主力離隊，幸好上仗作客贏波成功止跌，今仗回師主場面對剛喺榜首大戰輸波，連「一哥」位都保唔住嘅小保加，有望再下一城拉近同一眾前列分子嘅距離，一於捧河床平手盤。

（周一清晨5時15分開賽）

河床同小保加呢兩隊阿甲傳統勁旅，早前曾經喺南美自由盃16強相遇，結果小保加因球迷鬧事被判輸波出局，仲令到河床最終贏得自由盃冠軍，可以話係充滿戲劇性。不過，河床贏咗自由盃冠軍後，返到本土聯賽後連續3場都贏唔到，仲有主力拉美路富尼斯摩利、杜費路古迪利斯同謝文比薛拿離隊。好在河床上場作客新芝加哥終於大勝成功止跌，今仗只有雲基安尼唔出得，陣容完整下有力繼自由盃首回合後再喺主場贏小保加。

小保加卡里利缺陣
小保加上仗喺多名主力踢國際賽缺陣下，喺完場前畀聖羅倫素攻破大門輸0比1，同時將榜首位置拱手相讓畀後者。小保加今仗有卡里利因早前暫緩停賽令，而缺席今輪火併河床嘅打吡大戰，球隊近5場作客雖全部贏晒，但對手都唔係前列分子，所以「含金量」唔算太高，今仗面對已復甦嘅河床，相信會非常難踢，平手盤推介捧河床。