上季異軍突起嘅卡斯洛達，今晚喺俄超主場硬撼莫斯科戴拿模。前者明顯受到歐洲賽拖累，開咧後演出飄忽不定，相反莫斯科戴拿模今季實行「本土化」後，表現愈來愈穩定，射手高哥連今仗更刑滿復出，絕對唔赦有後顧之憂嘅卡斯洛達，讓球客勝咪錯過。
（周日晚9時30分開賽）
卡斯洛達有歐霸後顧
卡斯洛達上季一度有力衝擊聯賽冠軍，始終實力不及班霸辛尼特，最終滑落到第3，但成績比預期中理想。今季當然想更上一層樓，不過自7月尾已開始踢歐霸外圍賽，對佢哋體力消耗影響唔細，過去5場聯賽僅得1勝，嚟緊周中又喺歐霸分組賽作客「蜜蜂兵團」多蒙特，今仗對莫斯科戴拿模，卡斯洛達難免有所保留。
莫斯科戴拿模今夏採取緊縮政策，唔單止買人方面都係低價及免費，而大部分都係俄羅斯土炮，反而放走晒華布拿、古蘭爾、迪素迪沙基、杜格拉斯法蘭高等外援球星。當大家以為戴拿模會戰績下滑之際，佢哋除咗首輪不敵上季盟主辛尼特外，打後5場全部未輸過，睇落「本土化」開始見效，上仗坐波監嘅俄國射手高哥連，今仗可復出殺敵，加上雙方近5次碰頭，咁蹺主隊未嘗一勝，斯維認為莫斯科戴拿模有力全身而退，仲有得受讓咁筍，梗係揀讓球客勝喇。
