瑞典超「雙堡之戰」，希爾星堡主場對哥登堡，瑞典超已進入爭標直路，哥登堡只係落後榜首諾高平1分，換言之，只要今仗贏波，就可重奪「一哥」位置，戰意勢必高昂。反觀，希爾星堡高不成、低不就，已兩連敗，似乎開始放軟手腳，難壞對手大事，一於直取哥登堡客W。

（周日晚11時30分開賽）

今季瑞典超爭標形勢激烈，前4位球隊諾高平、哥登堡、AIK蘇納、艾夫斯堡，咬得好緊。諾高平前晚擊敗卡爾馬，超前哥登堡，迫使哥登堡又要贏波，先至可以攞番榜首位置。慶幸哥登堡狀態相當弗，聯賽3連勝，入8球兼不失，中場蘇連列克斯包辦其中4球，銳不可當。哥登堡上季屈居馬模之下，成為亞軍，今季當然唔想再做阿二，爭冠決心毋庸置疑，值得長追。

希爾星堡戰意鬆懈
希爾星堡今季一直喺中游浮沉，爭標冇佢份，亦冇降班威脅，所以來到季尾，球員戰意難免會有所鬆懈，近兩仗對前列球隊諾高平、馬模，都輸波收場，而且共失6球，包括上仗主場吞馬模3蛋，就算今仗有主場之利，睇怕都惡唔出樣。