日乙今日有唔少賽事，其中排第3嘅大阪櫻花會喺主場迎戰倒數第3嘅櫪木ＳＣ。兩隊同樣喺日前舉行嘅日皇盃賽事輸波出局，狀態如何相信唔使多講，但今仗始終係櫻花主場出戰，加上球隊實力遠勝櫪木ＳＣ，相信有望可以贏番場，一於捧櫻花主場贏波。

（周日晚6時開賽、馬會網上文字直播）

櫻花上場日皇盃以1比2不敵ＦＣ大阪，結束短暫嘅不敗走勢，球隊目前有前鋒永井龍、後衞藤本康太及門將金鎮鉉未好番唔踢得，而前鋒田代有三因傷上陣成疑，但隊長山口螢為日本國家隊服役後已經歸隊，今仗可以領軍，相信可為新加盟的前鋒艾美臣同中場馬諾達馬仙奴提供入球機會，攞到轉會後嘅首個入球。櫻花今季主場表現唔錯，今仗面對6月時作客都贏3球嘅櫪木ＳＣ，主場要贏波相信絕非難事。

暴雨影響櫪木ＳＣ操練
櫪木ＳＣ上仗喺日皇盃主場互射12碼輸畀流通經濟大學，球隊走勢明顯有所回落，加上近日嘅操練因為受到暴雨來臨而有所影響，對球隊嚟講絕對唔係好事。櫪木ＳＣ今仗有中場朴亨鎮要坐波監冇得踢，而後衞尾本敬則因傷上陣成疑，雖有中場莊拿芬彭利拿近日落實加盟球隊，但今仗要作客贏波相信唔係易事，一於捧櫻花可以重上勝軌。