阿仙奴小胜士日重心
 
卫冕足总盃真係咁易？今晚英西德三场盃赛决赛先后上演，英格兰足总盃卫冕冠军阿仙奴将会迎接维拉挑战，表面上兵工厂应该毫无意外可以连续两年攞到呢个冠军，不过上季侯城够易打啦，阿仙奴咪又係搞到加时至赢，而且云格向来保守，呢场点会咁早放胆抢攻，玩吓手又俾宾迪基屈一球先，下半场先反胜对手，仅胜1球机会实在太大。（周六28，now621及633台周日12:30am直播）
 
同上届比，阿仙奴今季唔多唔少都算有啲进步，同样嘅半季冠军，联赛由第4升上第3，季尾走势强劲，煞科战大胜4:1，都反映到现时呢队阿仙奴状态唔差，不过同上季嘅决赛一样，都几可以肯定呢队阿仙奴喺决赛要背上热门嘅沉重压力，上季对侯城上半场连失2球，靠卡索拉早早追番粒救回一命，打到加时至反胜，阿仙奴喺关键大战嘅心理质素向来一般。
 
阿仙奴遇压力多失准
 
当然好多人觉得佢哋今季有进步，但主场对摩纳哥嘅惨败，又再证明阿仙奴真係一队，愈有期待愈觉无奈嘅球队，所以今晚全世界都认为佢哋赢硬嘅时间，随时又令大家失望而回。
 
宾迪基食住对手后卫
 
咁当然，要阿仙奴输都要维拉有本事至得，的而且确，球队换上舒活后表现大有进展，尤其打番起宾迪基，呢个射手3月起轰入11个入球，绝对係今场维拉博爆冷最大武器，今场呢个比利时射手对住梅迪萨卡及高斯尼，速度身形上都佔绝对优势，如果阿仙奴又好似上季咁半场魂游，维拉有可能成为先开纪录一方。
 
不过维拉领先唔代表阿仙奴追唔番，禾确特刚战半场大演帽子戏法，呢场绝对有可能取代7场冇波入嘅基奥特任正选，就算落后要攻，换基奥特入嚟打双箭头又得，基于维拉防线都係脆过威化饼，尤其个巴特古辛係后防一大肿瘤，阿仙奴一个半场反败为胜绝对係能力范围之内，睇嚟好有可能出现2:1左右嘅比数，阿迷又可喺惊心动魄下庆祝捧盃。