今晚英超壓軸大戰上演「雙紅會」，曼聯於奧脫福主場迎戰利物浦，「紅魔鬼」近年食住死敵，近七次對賽五度擊敗利物浦，戰績明顯佔上風，加上「紅軍」中場核心菲臘比古天奴今周停賽，隊長佐敦軒達臣同拉爾拉拿亦因傷上陣成疑，戰鬥力大打折扣。今場主勝有1.8倍，真係有買趁早呀！

（now 621周日凌晨零時30分直播）

兩軍向來都視對方為死敵，球員落得場都會踢得特別落力，不過利物浦領隊羅渣士遇強即屈，對親勁旅都冇乜針對性踢法，上季面對曼城、車路士、阿仙奴同曼聯呢四支傳統勁旅，八戰僅贏得一場，當中更被紅魔鬼「雙殺」。其實羅渣士由2012年上任做利物浦主帥開始，紅軍對住曼聯輸多贏少，交手七次輸咗五仗，贏得兩場咁大把，兩場勝仗都喺13至14年度球季發生，因為當年曼聯正值「莫耶斯之亂」，紅魔鬼由比起羅渣士更唔掂嘅莫耶斯帶領，羅帥先難得贏番兩場。

桑馬達紅軍剋星
尹戈爾舊年接掌曼聯，季前於國際冠軍盃與利物浦對戰先贏3比1，連同上季聯賽主場贏3比0及作客贏2比1，已連續三場殺退死敵；西班牙進攻中場桑馬達更三戰入四球，成為紅軍剋星。曼聯今仗有中場卡域克受傷休戰，但中場中路可起用舒韋恩史迪加夥拍舒尼達連，影響不大，加上大軍前線加入「新亨利」安東尼馬迪爾，可能成為秘密武器都唔定。

利物浦今戰陣容不整，進攻中場菲臘比古天奴上輪聯賽對韋斯咸領紅，今仗要坐波監，呢位巴西球星係「紅軍」陣中最具創造力球員，加上兩位中場大將佐敦軒達臣同拉爾拉拿因傷或缺陣，射手賓迪基供應肯定大減，而巴西兵羅拔圖法明奴尚未融入球隊，單靠占士米拿不足以撐起中場，預期球隊會處下風，曼聯贏面甚高。