積臣馬天尼斯挑戰MSN
今輪西甲焦點之戰，馬德里體育會主場對巴塞隆拿！巴塞上季4次擊敗馬體會，當正「私房菜」咁食，兩位球星美斯同尼馬剛於國際熱身賽大顯身價鬥數胡，狀態弗到漏，今仗係時候喺西甲開齋。馬體會新簽射手積臣馬天尼斯演出對辦，適逢巴塞防線人腳不整，相信呢位哥倫比亞國腳有大把搵食空間，首選入球大。
（now632周日凌晨2時30分直播）
巴塞兩大巨星美斯、尼馬今季聯賽仲未入波，的確令人感到意外。不過佢哋始終係頂級球員，已經迅速喺日前國際賽檔期重拾射門鞋。美斯為阿根廷披甲兩仗，轟入3球，至於尼馬梅開二度，協助巴西大炒美國4比1，互助輝影。兩位超級射手踢番順之後，肯定係對方守將嘅噩夢。
巴塞防線人腳唔齊
唔好忘記，蘇亞雷斯冇份踢國際賽，叉足電搏殺，「MSN」火力全面爆發，試問馬體會點抵擋呢？不過要留意巴塞中堅碧基停賽，右閘丹尼爾、門將哥迪奧巴禾，以及兩位後備守將艾迪安奴同杜格拉斯彭利拿因傷倦勤，防線人腳單薄，未必保得住清白之身。
馬體會出售文迪蘇傑之後，簽入波圖射手積臣馬天尼斯，佢上季以21球，成為葡超神射手，轉戰西甲一樣難唔到佢，上輪聯賽已開齋，協助球隊大勝西維爾3比0。呢位哥倫比亞國腳似乎行緊同胞法卡奧當年成名之路，今仗鬥豪門巴塞，當然要盡情表演，打響名堂。馬體會主場唔會擺「大巴陣」，大盤可期。
