近6聯賽交鋒例駁火
今日日職獨腳戲浦和紅鑽主場對柏雷素爾，浦和紅鑽踏入次階段後，演出稍為走樣，尤其係防線甩漏甚多，加上後防槙野智章受傷，情況更令人擔憂。好在紅鑽前線火力夠猛，入波唔成問題。柏雷素爾近期亦攻強守弱，雙方近6次聯賽交鋒全部開大，一於再追大盤。

（有線61及201台周五晚6時30分直播）

紅鑽首階段成功封王，不過次階段頭5場比賽只得1勝，雖然近期成績有改善，但現時只能喺中游浮沉，水準仍然非常飄忽，早前日職作客慘吞橫濱水手4蛋，之後轉戰日聯盃8強首回合，再以0比5大敗於新潟天鵝腳下，但上仗次回合又可以贏番對手3比0，表現難以捉摸。不過佢哋近3仗主場全勝，今仗喺自己地頭出擊，應會加多幾錢肉緊爭勝，希望盡快先開紀錄。

柏軍搶攻追榜首
至於柏雷素爾亦剛於日聯盃出局，球隊喺亞冠盃8強首回合主場1比3不敵FC廣州，估計下周中次回合作客都難以翻身，有理由相信柏雷素爾會更注重聯賽爭標，球隊現時只係落後榜首鹿島鹿角3分，贏埋今場就可以進一步追貼對手，目標鮮明。同埋柏雷素爾近5場作客贏咗4場，無懼紅鑽主場威勢，預料雙方會互相駁火。

事實上追查兩軍嘅對賽紀錄，兩隊近6次聯賽碰頭，全部開入球大，合共炮製咗29個入球，相信今場又會演入球騷，大盤仲有1.7倍好分頭絕對值得吼實。