天使主場首演騷哥利
天使開心回歸踢好波！迪馬利亞喺曼聯慘變「板櫈天使」，今夏決心轉投巴黎聖日耳門（PSG）懷抱。呢隻阿根廷快翼上仗首次為新東家披甲即交出助攻，變番做「開心天使」嘅佢賽後更大讚新生活冇得彈。今晚係迪馬利亞首次喺王子球場主場披甲鬥波爾多，梗係要做番齣好戲省靚招牌，1.68倍「讓主」咪嫌熱。

（TVB302台周六凌晨2:30直播）

迪馬利亞上季加盟曼聯初期，一度成為「紅魔」核心，但自從佢養傷後上陣機會大減，加上唔理解尹戈爾嘅戰術理念，最終決定轉飯鑊加盟PSG。呢位阿根廷國腳上仗後備落場，隨即交出一記助攻畀拿維斯建功，重現効力皇馬時嘅西甲助攻王本色。賽後佢High爆話為PSG披甲堅開心，又大讚隊友水準高，成個人生猛番晒，伊巴謙莫域唔踢得都冇有怕！

波爾多射手搏到殘
事實上PSG近期Fit到漏，連埋法冠盃在內開季5戰全勝兼零失球，仲要有鐵衞堤亞高施華復出，防線更係無懈可擊。或者球迷擔心佢哋會受FIFA病毒影響，幸好前鋒卡雲尼同中場迪馬利亞未獲國家隊徵召，另外拿維斯、盧卡斯洛迪古斯亦冇踢足，對PSG火力影響有限。何況呢間法甲豪門日前宣布捐出100萬歐元（約870萬港元）援助敍利亞難民，好波又好品，主場球迷打氣都落力啲啦！

客軍波爾多雖然參戰歐霸盃提早開季，不過班波狀態始終谷唔起，直到上仗主場2:0砌低南特先攞到聯賽首勝，可惜之後又遇到國際賽期打窒個勢。更大鑊嘅係上季首席射手迪亞高洛蘭喺聯賽仲未開齋，好衰唔衰佢又畀烏拉圭徵召入伍，連續兩場熱身賽正選上陣，跟手又要越洋飛返法國備戰，要知道呢位射手上季入波數字佔咗波爾多總入球3成，捱到殘晒仲點有力搶分先？