歐國外C組西班牙作客馬其頓。西班牙上輪擊敗勁敵斯洛伐克升上榜首，不過由於斯洛伐克、烏克蘭亦步亦趨，西班牙想直接出線仍要繼續全力爭勝。馬其頓雖係弱旅，但勝在有拚勁，尤其主場出擊甚少龜縮。翻查紀錄，馬其頓今屆3場主場外圍賽均開半場大，值得再追。

（有線62及202台周三凌晨2時45分直播）

出線未穩全力搶W
西班牙上輪憑佐迪艾巴及恩尼斯達建功，主場以2比0擊敗斯洛伐克，除報卻首循環落敗之辱外，並以較佳對賽成績反壓同分嘅斯洛伐克升上榜首，不過由於排第3嘅烏克蘭同日贏波，故西班牙現時只以3分領先烏軍，睇番賽程西班牙仍要作客烏克蘭，故想直接出線暫時仲未可以安寢。

西班牙上仗排出全攻型陣式，車路士鐵三角迪亞高哥斯達、法比加斯同柏度洛迪古斯、中場大衞施華及恩尼斯達全部正選，成功喺比賽初壓制斯洛伐克，最後只係用咗30分鐘就領先兩粒，早奠勝局。

為免夜長夢多，預計今仗亦會開波便大舉壓迫。馬其頓雖然出線無望，但球員勝在有鬥心，無論面對前列球隊抑或榜末弱旅都甚少刻意死守，佢哋今屆3場主場外圍賽都開半場大，而且首循環作客西班牙一樣冇死守，單喺上半場兩隊便合力炮製4粒入球，半場大好路一於再追。