重奪榜首狀態返晒嚟
世界冠軍醒番晒！自從舊年喺巴西捧得世界盃後，德國隊一直瞌緊眼瞓，直至歐國盃分組賽形勢吃緊至識醒，上周六凌晨主場擊敗勁敵波蘭重奪D組榜首，全隊狀態同決心都返晒嚟，今晚乘勝追擊遇上態沉力弱嘅蘇格蘭可望再下一城，讓球盤德國讓一球，上盤係黑柴信心之選。

（有線61及201台周二凌晨2時45分直播）

德國自從贏得世界盃後，一班星級球員似乎已經心滿意足，陣上明顯見到悠閒同欠缺爭勝動力，而且狀態亦進入咗漫長嘅調整期，直至上周末之前，佢哋世盃後10場國際賽只錄得5勝2和3負成績，當中2場勝仗仲係對魚腩直布羅陀，成績絕對唔合格，喺歐國盃D組亦屈居波蘭之下。

好在球員及時振作，主場贏波蘭3比1不但攞番榜首位置，仲重拾霸氣，全場射門達21次，箭頭馬里奧葛斯梅開二度，加上一球中柱同一次被救空門，表現勇冠全場，而包括湯馬士梅拿、比拿拉比、卻奧斯、奧斯爾同舒韋恩史迪加組成嘅攻擊群，走位配合同互傳都絲絲入扣，踢出自世盃後最sharp醒表現，全隊信心返晒嚟，今晚好難勒得住。

蘇格蘭一沉百踩
蘇格蘭喺今屆歐國盃外圍賽頭幾場踢得唔錯，球隊喺史特根領導下踢出紀律同鬥心，令舉國傳媒同球迷充滿憧憬，甚至預期佢哋可以取得久違嘅大賽決賽周資格。可惜樂觀得太早，球隊本身限於實力，無論個人質素同攻擊力都未及水準，狀態一旦回落就現形，啱啱作客不敵格魯吉亞，畀愛爾蘭過咗頭跌到第4位，爭出線受到沉重打擊，最慘係表現不濟，全場射門唔多仲竟然零中目標，根本輸得抵。賽後連領隊史特根都被插排兵布陣失敗，話佢唔理球員喺本身球會表現，寧用一啲球會坐冷板球員，一沉百踩下士氣直插谷底，面對回勇嘅世界冠軍係聽炒格。