歐國外I組頭場阿美尼亞主場對丹麥。雖然前者有「阿美尼亞施丹」米希達利恩擔大旗，可惜單天難保至尊，主隊已經連場不勝，今仗撞正「二哥」兼剋星丹麥，就算有地利都難有運行，客W咪錯過。
（有線61、64、201及203台周二凌晨零時直播）
阿美尼亞以往屬魚腩部隊，但前年世盃外作客大炒丹麥4粒震驚歐洲球壇，當中米希達利恩更大演帽子戲法。呢位「阿美尼亞施丹」今季喺多蒙特勁弗，可惜該隊整體水準唔高，加上開始畀對手睇通條路見晒底。阿美尼亞今屆歐國外6戰未贏過兼輸足5場排包尾，明顯打回原形。
「Lord賓」為國披甲分外醒神
次席嘅丹麥上仗遭阿爾巴尼亞悶和，現時呢兩隊同分但丹麥打多一場，丹麥如果想取得頭兩名直接出線入場券，除希望阿軍今輪對住葡萄牙失分外，自己亦要做好本分全力爭勝。雖然陣中箭頭賓特拿今季於禾夫斯堡打後備居多，但每每落場都交到貨，包括德超盃對拜仁完場前扳平，兼喺互射12碼奠勝，況且「Lord賓」為國披甲分外醒神，加上之前5次對住阿美尼亞，丹麥贏咗4次，擺明格食格喇，為搶分唔會hea踢，客W有1.85倍宜趁早入貨。
