今晚歐國外I組賽事，由萬人迷基斯坦奴朗拿度（C朗）領軍嘅「一哥」葡萄牙，作客對阿爾巴尼亞。論牌面實力葡萄牙當然贏成條街喇，不過C朗季初明顯未弗陷入球荒，對一向勁倚賴佢進攻嘅葡軍影響極大，初段難咬得入龜縮嘅阿爾巴尼亞，況且該隊今屆5場外圍賽有4次開半場和，數據咁堅挺，半場和一於追多鋪。

（有線64及203台周二凌晨2時45分直播）

葡萄牙現時於I組以5戰4勝1負得12分排榜首，唯一敗仗就係上年9月於主場意外輸畀今場對手阿爾巴尼亞。近年葡萄牙前鋒位置人才凋零，入球重任落喺王牌C朗身上，可惜呢位萬人迷近況唔多對辦，連同西甲及熱身賽在內，已經連續6場食白果，對於呢位入球機器嚟講非常罕見。

葡萄牙冇強攻本錢
今次葡萄牙大軍名單中，除C朗外只有効力史雲斯嘅艾達盧比斯一名正宗箭頭，其餘中前場主力拿尼、哥利斯馬、丹尼艾維斯都係翼鋒或中場，欠缺埋門把握，難有強攻本錢。葡萄牙今屆5場外圍賽有4次開半場和，而且4次入面有3次要靠C朗下半場入波先奠定勝局，如今C朗陷入球荒，葡萄牙想喺上半場入波就難上加難。

阿爾巴尼亞現時同次席嘅丹麥同分排第3，有機會首次打入大賽決賽周，効力法甲南特嘅簡拿及拿玻里守將希沙積較有級數，論整體實力同大賽經驗肯定比葡萄牙遜色。該隊上次作客爆冷擊敗葡萄牙靠穩守突擊，都係上半場死守到底，靠下半場一次偷雞贏波，相信今次沿用同一戰術，半場和有2.05倍不妨再追。