今晚除咗有歐國盃外圍賽之外，仲有國際賽熱身賽，法國主場對塞爾維亞。法國係明年歐國盃決賽周主辦國，唔需要踢外圍賽，領隊迪甘斯更加要把握熱身賽機會練兵，備戰態度肯定認真。反觀塞爾維亞今場純粹陪太子讀書，唔慌會搏，阿King直取法國讓球主勝。（有線62及202台周二凌晨2時45分直播）
法國日前熱身賽作客以1比0擊敗有C朗助陣嘅葡萄牙，攻門次數及控球率都佔優，球員表現非常搶韁。皆因法國陣容人才濟濟，除咗賓施馬、保羅普巴、基沙文、基奧特等大牌球星之外，舒尼達連、干度比亞，甚至剛加盟曼聯嘅安東尼馬迪爾，都係獨當一面嘅猛將，隊內位置競爭激烈。特別係明年決賽周喺法國舉行，眾人都想成為球隊一份子，希望喺鄉親面前揚威，更加要趁熱身賽展示實力，博取迪甘斯歡心。塞爾維亞喺外圍賽6戰只有1分，已提早出局，今場戰意成疑。加上塞爾維亞之前兩次作客法國，都輸波而回，阿King睇唔出今場有破宿命嘅理由。
北愛爭上岸夠「匈」狠
歐國盃外圍賽F組，榜首北愛爾蘭今仗主場只要擊敗匈牙利，就可以提早出線，爭勝決心必強，北愛小讓平半，力捧上盤。同組希臘已經篤定出局已無心戀戰，作客次席羅馬尼亞，當然要主W。
