國際賽拖累焗用二線兵
美職常規賽進入最後直路，明早有場矚目大戰，由哥倫布機員主場迎戰FC達拉斯，呢場波對兩邊爭取較佳排名相當重要，但今次兩隊加埋有14個主力要踢國際賽，大家焗用二線兵，默契差咁啲，相信入波唔會多，捧細盤。
（TVB 301周一早上7時直播）
哥倫布機員近況其實唔錯，已經連續7場聯賽入到2球或以上，不過今場有8個主力離隊踢國際賽，包括今季入咗18球嘅塞拉利昂射手基卡馬拉，呢8個主力佔機員今季51.1%入波同21.4%上陣時間，冇咗佢哋，即係根本係第二隊波，之前嘅賽績可以掟晒落垃圾桶。
兩軍夾埋14主力缺陣
FC達拉斯季初一度排榜首，點知上個月突然失準連輸3場，上仗贏皇家鹽湖城後拎番多少信心，點知今場又有6個球員要踢國際賽，上場2個入波功臣加拿大前鋒阿堅迪利同哥倫比亞射手法比安卡斯迪路都被召入國家隊，今場作客隨時想悶和算數，兩隊加埋總共有14個主力缺陣，話冇影響就呃人，一於揀番細盤。
