美職今日有場大戰，由哥倫布機員主場迎戰FC達拉斯，本來呢場波相當有睇頭，可惜兩隊加埋有14件主力畀國家隊召咗去踢「太公波」，殘陣相信會穩打穩紮，2.05倍「入球細」值得捧場。

（TVB301周一早上7:00直播）

夾埋14件踢太公波
哥倫布機員踢法進取，佢哋已經連續7場聯賽入2球或以上，不過今次就畀國際賽玩死，8件主力要踢太公波，包括今季入咗18球、喺射手榜壓住韋拿、羅比堅尼同基奧雲高嘅基卡馬拉。統計顯示機員今季逾半入波由呢8個球員包辦，難怪教練巴希達都話好似帶住隊新兵出戰咁陌生。

客軍FC達拉斯季初一度進佔榜首，點知上個月突然失準連輸3場，上仗砌低皇家鹽湖城係就係攞番多少信心，好可惜今場又有6件要踢國際賽，上場兩個入波功臣阿堅迪利、法比安卡斯迪路缺陣搞到成條攻擊線散晒，點睇佢哋今場都唔敢攻啦！